الورقه التاسعه - شعر وكلام من ده

شمس الشموسه ..

.............

تعرف ليه الصبح بيصبح فى الصبحيه ..

وليه مايجيش أبداً بالليل ..

-        لامااعرفش ..

عشان الشمس بتصحى عفيه ..

بعد شويه تنام يالليل ..

-        وكل ده ليه..؟

علشان بكره تصحى قويه ..

تلعب حبه ..

تعرف حبه ..

-        تحلم حبه ..

وقبل ماتغروب ..

تعمل شغل يهد الحيل ..

تعرف ليه فى الكون الوان ..

ليه مابقاش لون .. اتنين ..

-        لا مااعرفش .. ؟..

علشان الناس الوانها كتير ..

لون متلخبط ..

لون متظبط ..

لون بيزقطط ..

لون بيطير ..

اصل الناس اشكال والوان..

-        تعرفى انت تكونى قويه ..

زى الشمس ..؟..

زى الطير و الاغصان ..

طايره بحب وبحريه ..

عايشه بسيطه بكل امان ..

-        لما سلام فى الكون ده يعم ..

لما العدل يعيش ويأم ..

لما الناس هتعيش فى الله ..

تبقى حياتنا احلى حياه ..

***

لو تقدر 

ــــــــ

لو تقدر تعشق كل الناس ..

هتشوف الناس من بعضيها ..

وهتعرف معنى الحريه ..

        ***

لو تقدر تتكلم بحماس ..

عن نفسك إيه راح يرضيها ..

هتعيش وهتمشى بحريه  ..

وهتعرف ليه الأنسان ..

بيحب ويكره و يقاسى ..

ويِمِيِلْ ويِمْيِلْ ع الناسى ..

ويجور ع النايم والكسلان ..

ويشيْل ناس من بعضيها ..

وهتعرف أجناس الناس من أراضيها ..

وتحب الناس واللى خالقهم ..

بس بجد ..

***

أسكندريه

يصعب عَلَّىْ الفرقه بين إتنين ..

يصعب عَلّىْ عيال مابتشوفش الطريق ..

يصعب عَلّىْ الحلم طالع جبل ..

يصعب عَلّىْ عيون تنادى ع الغريب إشتقت لك ..

فأحضن شجونى وبينا نهرب ع الفضا والبحر ..

يمكن بحور الكون تصبح دفا ..

أنا كنت قاعد بحضن دمعتى بكفى ..

حين إلتقت عينى بعينك ..

أشتقت لك كما طفل يشتاق للغه ..

أجمل عيون أجمل لقا ..

إدينى توبك ياأميره أمزعه بكفى ..

وأرمى همومى على صدرك تعب ..

إدينى كفك تحضنه كفى النحيفه وتعصره ..

أنا مش براهق إنما ..

بعشق ملامحك ربما ..

لكن عشقى يختلف ..

بعشق معانى الأشتياق والقبل ..

و أنا كنت رافض للعناق لكن حصل ..

أعشق ملامح حلمى جواكى ..

وأنا من زمان بشتهى لحظه ف هواكى ..

لكن عيونك نبهتنى أن أنا ..

عاشق عجوز ..

وقلبك أنت ياحبيبتى ..

عاشق صبى ..

*

للبحر ريحة الأنتشار..

وفى السفر أحلام ..

تاخد عيونى وتنطلق تعبر بعيد ..

جنب القمر ف الفجر ..

*

وسط الليالى المقمره بغرق هناك ..

جوه دوامة الحلم البسيط ..

*

تحت المطر بحلم إن أنا فارس قوى ..

*

للبحر يود ..

وللعيون المشتاقين لحظة دفا ..

وللحوارى الضيقه ريحة جدود ..

كان حلم أصغر مافيهم بنات ..

وف حلم أكبرهم بشر ..

*

" بحــــلم بأنك مـدينه ..

تحضن عـيونا الحـزيـنه ..

تحـلـم مـعانـا بـدفـا ..

تحـلـم مـعانـا ولـينا .."

*

للبحر حكاوى قديمه ..

زى الميلاد والموت ..

زى الفراق واللقا ..

وتملى تهرب أميرتى م القصور الضيقه ..

تدخل حوارى العاشقين ..

وسط أكواخ البنات ..

ومنادى قصر الحلم يصرخ بالندا ..

وأمير بلاد العشق طالب قمر ..

وأنا نفسى أقابل حبيبتى على رصيف القاطره ..

وعينى تجرى فى إتجاه البحر ..
المح أميره حنينه بتطير ف توب ..

تسبى عقول البشر .. تسبى القلوب ..

لكن عيونها فى إتجاه البحر ..

وعيونى تستنى الشروق ..

ياهلترى مين اللى كان عارف أن أكوخ الجزيره تطرح بنات ..

*

للبحر موجه حنينه ..

وللعيون السرحانين لحظة شرود ..

ولعيونى الفضا ..

وف توب أميرتى كل أمواج الشطوط ..

أنا أصلى خايف م البحور ..

لكننى أهوى الغرق ..

والحلم ..

والعشق البسيط ..

لكنى دايماً ياأميرتى بفضل وحيد ..

*

ياأسكندريه موجك غريب ..

تملى يهرب لبلاد غريبه ..

تملى يلقى الشط ضيف ..

والشمس تغسل وشها بدموع وداع ..

وعيونى تجرى تقولها ..

فين الميعاد ياشهرذاد ..

دا الريح بتصرخ ساعة الترحال ..

*

" وقـف ساعاتـك يازمـن ..

خـلـى الطريـق يطـول ..

كان نفـسى يـوم أطـول ..

والحـق قـزاز الطـيارات ف الجـو ..

دى اللحـــظه قـبل السـفـر تحـلـو ..

لكنـى بـرجـع مـن جـديـد رحـال .."

*

بصيت لها ..

بصت ..

ضحت ف عنيها ..

بكت كما أرض بكر نزلت دموعها كلها لحظة وداع ..

-       سلمتى عالشط البعيد ..

-       باى باى يابحر ..

تمتد إيدى من وسط أكوام الشنط ..

تحضن إيديها بسرقه مشتاقه ..

وعنيها زى السهم تخترق قلبى ..

لو مش هنعرف نفترق ..

ولا نتلاقى ..

نبكى وخلاص ..

  ***

سندريللا ..

ــــ

ياسندريللا ..

الضحكه منك مُهر ..

بياخدنى يجرى بعيد ..

أدوب فى ضحكايه ..

 الحب دا حكايه ..

زغللتى يامرايه ..

إحنا إلتقينا فى إيه ..؟

إحنا إلتقينا إزاى ..؟

ياعمرى ماأهلكك ..

باقى الزمن مش لك ..

أنا نفسى يوم أرتد ..

وأرجع صغير جداً ..

العب فى كراسه ..

يضرب جرس مرواح ..
نبكى لنا دمعايه ..

وألف أيدى بأيدها ..

ونسابق القمره ..

قمره وياقمره ..

قلبى الصغير يأمر ..

قلبى الكبير فيشب ..

أبص قدامه ..

ترسم لى أحلامه ..

أجرى فتسبقنى ..

وأفضل أنا وحدى ..

*

ياسندريلـلا ..

كل الخطايا بتحج ف عيونك ..

وأنا نفسى أتوضى ..

والفرض يتقضى ..

وأتوب ببسمايه ..

وأتوه بكلمايه ..

*

ياسندريلـلا ..

ف العمر مافى براح ..

وسفينة الملاح ..

طالبه العيون مرسى ..

**
زمانك مجاش
ــــــ

زمانك ماجاشى ..

ولاحبناشى ..

ولا ضمت عيونه آمال الولاد ..

ولا أمنيات البنات الرقيقه ..

ولا قلناش مكان الحقيقه ..

بحبك صديقه ..

عيونك جريئه ..

جراءة طفوله ..

وأحبك بريئه ..

ف أول خطانا ..

وأحنا ف أوله ..

وأحبك فى صمتك ..

وصمتك ياخدنى ..

أعيش جوه كونك ..

وأحس بجنونك ..

صوت فتى  : اكونى ليكى دنيا ..

صوت فتاة  :  اكون ليك حياه ..

صوت الفتاة :  انا وانتى دنيا ..

انا وانتى ناس ..

بدفء المشاعر ..

بلحظة حماس ..

 بلحظة تلاقى عيونى لعيونك ..

جنونى و جنونك ..

صوت فتى : وأكون ليكى دنيا ..

صوت فتاة  : واكون ليك حياه ..

صوت الفتى :  ياعمرى اللى جاى ..

ياعمرى اللى راح ..

يالحظة تلاقى ..

ياقلب البراح ..

بحبك تعالى ..

اكون لك واكونك ..

تدوبى فى مشاعرى ..

وادوب جوه كونك ..

تكونى لى مرسى ..

اكون لك سفينه ..

نبحر وننسى ..

حاضرنا وماضينا ..

اشوف بيكى بكره ..

اشوف بيكى مينا ..

صوت فتى : تكونى انتى دنيا ..

صوت فتاة  :  اكون ليك حياه ..

صوت فتى :   بحن لحوارى أكلها الزمن ..

وحلم الطفوله ..

وحلمى اللى كان ..

وعمرى اللى جاى ..

وعمرى اللى فان ..

بعيش الف فكره ..

مع الذكريات ..

وأتوه جوه ذكرى الليالى القديمه ..

والف الشوارع والف الحارات ..

من السيدة لمصر القديمه ..

الملم صباى وأشوف البشر ..

صوت فتى : واكونى ليكى دنيا ..

صوت فتاة  :  واكون ليك حياه ..

صوت الفتى  :  بحبك أغانى ..

أغانى أصفهانى ..

وبيرم ياخدنى لجوه الحوارى ..

وحداد يسحر ويرسم مبانى ..

بحبك تعالى ..

نطير ف العلالى ..

برغم الزمن ده ..

وجو المناهده ..

بحبك حقيقى بدون أوسمه ..

ولا حلفطه ولا نمنمه ..

ف صدرك حبيبتى بعيش ..؟

ربما ..

***
غنوه

ـــ

لو يبقى خيالى معاى هطير ..

وتيجى لى الدنيا فى شكل أمير ..

وأقول الربيع بكره يبان ..

بحبك يابكره ..

بحبك فهل ..؟

عيونك تطل ..

وتعشق عيونى ..

وتعشقنى ضل ..

بحب أبقى زيك أرفرف وأطير ..

*

لو يبقى خيالى معالى ح اكون

وأعدى لبكره أبو قلب حنون ..

 وأعمل مرجيحه بألف دراع ..

توصل للسما تطلع م القاع ..

تبقى مسمسمه ..

كده متقسمه ..

نعرف كلنا نفرح ونطير ..

لو يبقى خيالى معاى هطير ..

*

ساعات اشوف

ــــــــــــ

ساعات اشوف كل شىء واضح صريح ..

وساعات اشوف العتمه تقفل سكتى ..

مابشوفشى حد ..

ساعات اضمك .. ابعدك ..

اعشق جنونك .. وارفضك ..

 لكن عيونك ضالتى ..

تفرش ضياها ف سكتى ..

وساعات بشوف ..

ساعات بكون ..

عاشق عيونك ..

وساعات يكون ..

الكون فى كونك ..
وساعات بشوفهم كدابين ..

ساعات بشوف ..

***